’t Vastelaoves-femielie-festival Vastelaoves Villaasj haet dit jaor weer e program mit veur ederein get. Gein grote name, maar artieste die de kleinkuns van de vastelaovend omerme. Door de plaats – in de vertroewde Neelder Raodhoessjtraot – is ’t ’n ech festival veur aad en jónk. ‘Volges Nina Bongaarts, verantjwoardelik veur ’t program, kinne de kids d’r vrie róndjloupe en mitmake wie sjoon vastelaovend is’. ‘De get ajere jeug kint zich ammezere bie de Sjonniebuun mit karaoke of ’t Raad van fortuun. En d’r is veur alle sjmake gezèllige vastelaovesmeziek, veur de pap, veur de mam, de naobers, de naeve, nichskes en opa’s en oma’s.’
Nuuj is dit jaor de Villaasj-Kids-Buun. In samewirking mit De Katers kinne de kienjer in de Soos aan de Pasjtoor Ramakersjtraot belaeve wie sjoon de vastelaovend is. En d’r is ’ne Meet-and-greet mit jeugprins Dean 1.
Ouch waert dit jaor weer ’t Parade Paerd oetgerope. Deze pries geit nao de sjoonste kreatie die de miense ’t meis verwónjert. ‘Ederein duit hiejaan mit, maar de zjurie kiek veural nao de vastelaovesgengers die de wisselwèrking mit angere aangaon. Dit jaor is det neet meer in ’n Parade, maar op de Parade-buun, wo se kins paradere, zo döks wie se maar wils. En zo krieg dien kreatie al de aandach die ’t verdeent. Want dao geit ’t noe juus óm bie de Villaasj” , zaet Nina: ‘’t geit óm lekker mit mekaar joeks te make. Neet veur nieks is oos mótto dan ouch Belaef en sjpeel mit.’
De Villaasj begint op 11 fibberwari óm 14.11 uur. De entree is graties. Meer info: www.vastelaovesvillaasj.nl
