De Vastelaoves Villaasj waert dit jaor aangevöld mit ’n echte kienjerbuun: de Villaasj-Kids-Buun! Det pas gans bie ’t karakter van de Villaasj as hét Vastelaoves-femieliefestival van Limburg.
Op vastelaoves-zóndig 11 februari is de Villaasj. ’t Hert van oos Neel waert daoveur ómgetouverd toet e ech vastelaoves-dörp wo aad en jónk zich köstelik kinne ammesere. Kienjer kóste altied al lekker vrie róndjloupe op de Villaasj, maar de organisasie haet same mit De Katers veur ’n kienjerbuun gezorgd in de Soos aan de Pasjtoor Ramakerssjtraot.
‘Zeker veur de allerkleinste is det dalik ’n sjoon plek om zich op te haje’, zaet Nina Bongaarts, det verantjwaordelik is veur ’t program op de Villaasj. ‘Maar veer haje dao ouch ’ne ‘Meet-and-greet’ mit de jeugprins Dean 1. En det is veur ’n anger laeftiedscattegorie netuurlik ouch heel sjoon’, zaet Nina mit e knipuigske.’ Netuurlijk kinne de kids die det wille geweun lekker bie pap en mam blieve en genete van de optraejes op de Villaasj. Want, det is ’t mótto van de Vastelaoves Villaasj: belaef en sjpeel mit. Aad en jónk, gezèllig biejein. Nina guf aan det inkele artieste ouch optraeje op de Villaasj-Kids-Buun.
Via ’t zogenaamp Preuf- en proosplein kinne de bezeukers van de Villaasj mekkelik nao de Kids-Buun in de Soos loupe en weer truuk. Óm de veiligheid te waarborge waert e gedeilte van de Pasjtoor Ramakerssjtraot veur ’t verkeer aafgesjlaote.
